Bashkimi i operatorëve ekonomikë “iC Consulenten Ziviltechniker GESmbh”, kompani inxhinierike e regjistruar në Austri, “ELEA iC d.o.o dhe IBE d.d svetovanje, projektiranje in inzeniring”, kompani inxhinierike regjistruar në Slloveni, dhe SEED Consulting sh.p.k. dhe “InfraKonsult” sh.p.k., kompani lokale, është përzgjedhur si kompania fituese për projektin e metodologjisë për ndërtimin e Tunelit të Llogorasë.
Konsorciumi IC Consulenten parashikon në projektin e detajuar inxhinierik që tuneli të jetë 5930 metra i gjatë dhe ura që do të lidhë tunelin me Palasën 120 metra.
Në garë për përzgjedhjen e projektit final ishin dy kompani, ku IC Consulenten ia doli të mundë kompaninë italiane që ka ndërtuar tunelin më të gjatë në botë.
Tashmë Ministria e Infrastrukturës dhe Energjisë do të llogaritë koston e tunelit dhe do të hapë brenda vitit garën për nisjen e punimeve. Tuneli do të ketë dy korsi në secilin krah të tij, njëri me gjerësinë 3.5 metra dhe një korsi emergjence prej 1.25 metrash.
Shpejtësia e lëvizjes së automjeteve do të jetë deri në 80 kilometra në orë, çka mundëson kalimin e Qafës së Llogarasë për 7 minuta.
Tuneli do të jetë me pagesë për automjetet që do ta përshkojnë atë, por do të jetë studimi i fizibilitetit ai që do të përcaktojë tarifën. E gjithë vepra do të financohet nga buxheti i shtetit, me ndihmën e institucioneve financiare ndërkombëtare përmes kredive të buta.
