Extra 10 vendet me popullsinë më shtatlartë, kryesojnë sërish holandezët

10 vendet me popullsinë më shtatlartë, kryesojnë sërish holandezët

Personi më i gjatë në botë është Sultan Kosen nga Turqia, i cili ka një shtat prej 251cm. Por kur vjen puna për popullsinë më shtatlartë, në vend të parë janë holandezët.

Këtë gjë tregojnë statistikat më të fundit të këtij vendi, pavarësisht se shtatlartësia e tyre po vjen duke u tkurrur.

Holandezët prej gjashtë dekadash janë njerëzit më shtatlartë në tokë. Por agjencia qeveritare e statistikave nënvizon se prej të lindurit në 2001 janë 1cm më të shkurtë se sa gjenerata e viteve 1980.

Analizat sugjerojnë se kjo nuk mund të shpjegohet vetëm me faktin se në vend kanë emigruar persona nga vende të tjera.

Sipas Gert Stulp, profesor në Universitetin Groningen kjo mund të lidhet me krizën ekonomike të 2007.

Gjithashtu edhe konsumi i ushqimeve jo të shëndetshme jep efekt pasi kjo gjë po vërehet në SHBA. Sipas Stulp, ushqimet sot kanë më shumë kalori, por më pak vlera ushqyese.

“Duhet ndryshuar ushqimi. Dietat e viteve të fundit kanë më pak lëndë ushqyese që është e rëndësishme për rritje. Kjo besohet se është arsyeja pse amerikane janë duke u zvogëluar”, shprehet profesori.

Në krahasim me vitet 1900, holandezët kanë njohur një zgjatje të konsiderueshme pasi nëse mesatarja për burrat në 1930 ishte 175.6cm për të lindurit e viteve 1980 arriti në 183.9cm. Ndërsa për vajzat nga 165.4cm mesatare në 1930 në 1980 arritën në 170.7cm.

Shkencëtarët sugjerojnë se shtat lartësia lidhet me mjedisin, ushqimin por edhe me gjenetikën. Ata thonë se njerëzit akoma nuk e kanë arritur pikun e shtat lartësisë pasi ende jo të gjithë kanë mundësi të ushqehen shëndetshëm.

Rasti i Koresë së Jugut tregon se përtej gjeneve trupi mund të ndryshojë pasi vajzat janë zgjatur mesatarisht me 20 cm në 100 vite (1914-2014).

10 vendet më shtatlarta:

Holanda    175.62 cm

Letonia    175.61 cm

Estonia    175.13 cm

Danimarka  174.29 cm

Çekia 174.28 cm

Serbia     174.28 cm

Belgjika   173.59 cm

Sllovakia  173.48 cm

Bosnje-Hercegovina   173.35 cm

Islanda    173.21 cm