Një tërmet ka goditur New Jersey paraditen e së premtes (me orën lokale) duke bërë që ndërtesat në qytetin fqinj të New York-ut dhe në zonat përreth të dridheshin nga lëkundjet.
Shërbimi Gjeologjik i Shteteve të Bashkuara njoftoi se tërmeti ishte me magnitutë 4.7 të shkallës Rihter dhe se epiqendra ndodhej 7 km në verilindje të Stacionit Whitehouse, New Jersey.
Lëkundjet u ndjenë rreth orës 10:20 të paradites me orën lokale. Deri më tani, raportime për dëme nuk ka.
Tërmetet janë një dukuri relativisht e rrallë në Bregun Lindor të Shteteve të Bashkuara.
Banorët iu drejtuan mediave sociale ku u shprehën se tërmeti është ndjerë nga Filadelfia deri në New York dhe në lindje përgjatë bregut.
