Pas Vlorës, kryeministri Edi Rama kërkoi që Lungomare të ndërtohet edhe në Durrës. Të paktën ky është projekti që iu prezantua sot dhe ku ishte dhe kryeministri Edi Rama dhe kryetarja e bashkisë Durrës, Emiriana Sako
“Të mos thonë më durrsakët se ngelen prapa Vlorës”, tha Rama me batutë
Projekti zhvillimor shtrihet në një gjatësi prej 3 kilometrash dhe fillon nga Ura e Dajlanit, duke përfunduar tek zona e njohur si Kavalishenca
“Ky projekt do i bashkangjitet edhe portit turistik që është ende në fazën e negocimit me kompaninë e Emirateve për tu konkluduar dhe besojmë që së shpejti do të jetë në ndërtim”, tha Rama.
Projekti në letër
Shëtitorja do të përbëhet nga linja kalimi këmbësor, vrapimi dhe pista për biçikleta. Midis shëtitores dhe zonës se plazhit, parashikohet krijimi i stacioneve me pajisje sportive për aktivitete fizike në natyrë, si dhe krijimi i zonave për ushtrimin e sporteve ujore.
Gjithashtu parashikohet dhe krijimi i nyjeve kryesore ku do ofrohen shërbime gastronomie dhe nyje për funksione rekreative. Përgjatë shëtitores do ketë dhe kënde lojërash fëmijë, si dhe dhoma zhveshje e dushe dhe ndërrimit.
Parashikohet dhe zgjerim të brezit të rërës
“Zgjerohet deri në 35 metra”, thotë inxhinieri.
“Projekti duhet të mbarojë dhe me mbarimin e këtij sezoni të nisë puna në vjeshtë. Brenda këtij mandati duhet ta përfundojmë”, tha Rama.
Por nuk mjafton me kaq. Në të ardhmen Rama do të krijojë një strukturë të ngjashme me palmën në Dubai, vetëm se në Shqipëri do të jetë Shqiponja.
“Mendoj se duhet të përgatisim një kolpo ekstra, një ndërhyrje ne det siç është Palma. Ta bëjmë një ndërhyrje në det, një shqiponjë të madhe e ndërtuar e re nga A tek Zh. si zonë turistike. Aty bashkia mund të nxjerrë përfitime nga. Ky është një fazë tjetër por një shqiponjë do ta bëjmë në det”.
Por sa do të jenë të realizueshme, dhe nëse këto do kthehen në projekte konkrete mbetet për t’u parë.
