Ambasadorja e SHBA-ve në Tiranë, Yuri Kim, mbajti këtë të mërkurë një konferencë të fundit me gazetarët, përpara përfundimit të detyrës së saj në Tiranë.
Në fjalën e saj, Kim u ndal dhe te çështjet që Shqipëra duhet të fokusohet për të përmirësuar jetën politike dhe socio-ekonomike. Ambasadorja e SHBA-ve e vendosi theksin te vijimi i reformave të rëndësishme që janë ndërmarrë nga qeveria, si reforma e drejtësisë, çrrënjosja e korrupsionit si dhe lehtësimi i procedurave në çështjen e pronës.
“Çdo vend ka sfidat e tij, por kur flasim për gjërat që duhet të jenë ndryshe në Shqipëri, e themi këtë duke pasur respekt dhe jo sepse ne nuk kemi problemet tona. Më duhet ta qartësoj se ambasadorët që shërbejnë në Shqipëri nuk ndjekin axhenda personale. Nëse ka diçka që nevojitet të përmirësohet kjo është e rëndësishme që të bëhet. Por gjithashtu është e rëndësishme që të vijohet pa pushim për të mbajtur këto reforma, sikurse ka qenë reforma në drejtësi, sikurse është çrrënjosja e korrupsionit, sikurse është lehtësimi i procedurave për çështjen e pronës, që do t’iu bënte ju një vend më të pasur dhe më të fortë, sikurse janë dhe zonat e tjera të bashkëpunimit si ajo e fushës së mbrojtjes”, tha Kim.
Pyetjeve të gazetarëve për vështirësinë e përballjes me ish-kryeministrin Berisha gjatë mandatit të saj, Kim tha se çdo ambasador amerikan përballet me sfidat e tij.
Sipas saj, kjo pasi çdo ambasadorë e SHBA-ve kanë për detyrë që ta drejtojnë Shqipërinë drejt të ardhmes në çdo kohë.
“Çdo ambasador përballet me sfidat e tij, por ka diçka me SHBA-të ne gjithmonë përballemi me të ardhmen. Çdo ambasador amerikan që ka shërbyer në të shkuarën, që shërben aktualisht, apo që do të shërbejë në të ardhmen, do të përpiqet ta drejtojë gjithmonë Shqipërinë drejt të ardhmes”, tha Kim.
Gjatë fjalës së saj, ambasadorja Kim është shprehur se reforma në drejtësi i ka dhënë mundësi vendit që të hapte negociatat për anëtarësim në BE, teksa ka shtuar se kjo reformë po jep rezultate.
Kim mes të tjerash ka bërë thirrje që Shqipëria të ecë përpara deri në arritjen e qëllimit të uljes në tryezën evropiane.
Ndër të tjera, ambasadorja Kim ka përmendur disa nga përparimet e bëra gjatë kryerjes së detyrës së saj si ambasadore e SHBA në Shqipëri.
“Gjatë 3 vitesh e gjysmë kam pasur privilegjin që të isha si një ambasadore e re për të forcuar lidhjen e veçantë mes Shqipërisë dhe SHBA. Unë jam shumë mirënjohëse që kam pasur këtë mundësi dhe të njoh Shqipërinë, të vizitoj të 61 bashkitë e saj dhe të përpiqem të jap kontributin tim në demokraci dhe biznes.
Shqipëria ka ndërmarrë reforma të vështira, sidomos në drejtësi që i dha vendit tuaj mundësinë që të hapte negociatat për anëtarësim në BE. E kam thënë shpesh se reforma në drejtësi po jep rezultate. Mos ndaloni, vazhdoni të ecni përpara dhe hap pas hap derisa të arrini qëllimin tuaj. SHBA do të jenë me ju në çdo hap të rrugës. Ne nuk do të lëkundemi kurrë në aspiratat e popullit shqiptar për të zënë vendin që i takon në tryezën evropiane.
Bashkëpunimi ynë në fushën e mbrojtjes ka arritur nivele të reja. Në vitin 2021, Shqipëria ishte organizatore e Defender 2021, stërvitja më e madhe ushtarake që nuk ishte mbajtur kurrë më parë. Shqipëria ndërtoi mbi suksesin e asaj veprimtarie për të mirëpritur “Defender 2023”. Aktivitetet amerikane-shqiptare në fushën e mbrojtjes janë 3-fishuar.
Sulmet kibernetike të Iranit që filluan në 2022, treguan kërcënime të reja më të cilat duhet të përballemi së bashku. SHBA i ka akorduar 50 milionë Dollarë Shqipërisë për të forcuar sigurinë kibernetike, kjo është paketa më e mëdha që kemi dhënë për këtë fushë ndonjë vendi, përveç Ukrainës. Lidhjet e biznesit po rriten mes 2 vendeve tona. Ka ende vend për përparim, por përparimi po ndodh. Në Tetor nënshkruam memorandumin e bashkëpunimit. Këto investime do t’i mundësojnë Shqipërisë që të bëhet një qendër për shpërndarjen e energjisë në rajonin e Ballkanit Perëndimor. Në Qershor 2022 nënshkruam memorandumin e bashkëpunimit për telekomunikacionin”, tha Kim.
