Presidenti i Republikës, Ilir Meta, reagoi pas ngjarjes së rëndë në Kavajë, ku një person humbi jetën dhe 4 të tjerë u plagosën.
“Presidenti i Republikës Ilir Meta shpreh shqetësimin e thellë për ngjarjen tepër të rëndë dhe tragjike, të ndodhur sot në qytetin e Kavajës, ku një qytetar i pafajshëm humbi jetën dhe disa qytetarë të tjerë u plagosën. Presidenti Meta pati një bisedë telefonike me Kryetarin e Bashkisë së Kavajës, z.Isa Sakja dhe i kërkoi t’i përcjellë ngushëllimet dhe solidaritetin e Tij më të sinqertë të afërmve dhe familjarëve të qytetarit që humbi jetën, si dhe u uron shërim të shpejtë të gjithë të plagosurve”, lexohet në njoftimin e Presidencës.
“Presidenti Meta kërkon nisjen e menjëhershme të hetimeve për këtë ngjarje të rëndë, zbardhjen e shpejtë dhe të plotë të saj, si dhe vënien para përgjegjësisë të autorëve. Presidenti Meta thekson domosdoshmërinë e rritjes së gatishmërisë së Policisë së Shtetit dhe agjencive ligjzbatuese, për të marrë të gjitha masat e duhura për garantimin e sigurisë publike në vend dhe parandaluar përsëritjen e ngjarjeve të tilla kaq të rënda e tragjike”, shtohet në reagimin e Metës.
Ngjarja
Një 50-vjeçar, kalimtar në rrugë, ka mbetur i vdekur nga përplasja me armë zjarri e dy grupeve në Kavajë.
Ngjarja ka ndodhur mesditën e sotme në lagjen numër 4. Viktima është identifikuar si Ramazan Hasalliu.
Nga të shtënat kanë mbetur të plagosur 7 të plagosur.
Gjashtë prej tyre ndodhen në spitalin e Durrësit dhe një në gjendje të rëndë në Tiranë.
Policia ka shoqëruar dy persona si autorë të vrasjes së 50-vjeçarit, identiteti i të cilit nuk dihet ende.
