Ekzekutimi i bosit të drogës Behar Sofia mëngjesin e sotëm në mes të Tiranës, në një zonë shumë të mbrojtur, për gazetarin Artan Hoxha është një mesazh i qartë i autorëve se “kudo që të jesh nuk je i paprekshëm”. Hoxha tha se Sofia i trembej një fakti të tillë prandaj kishte vendosur që të jetonte në një pallat dhe zonë shumë të mbrojtur, por as kjo nuk e shpëtoi.
“Sot janë ngritur një seri pistash për të kuptuar cili mund të jetë ekzekutuesi nëse mund të jetë ndonjë tentativë tjetër e kohëve të fundit në trafik apo ngjarje e së kaluarës, pasi është marrë me personazhe shumë të fuqishëm, por kishte mbijetuar. Fakti që prej dy vitesh banonte pranë pallatit, ku është qendra tregtare pas Piramidës, aty banojnë personazhe shumë të rëndësishëm dhe sa i siguruar është të jetosh aty, lëvizin me eskorta me 3-4 makina…. Është një zonë shumë e mbrojtur.
Këtu është mesazhi që është dhënë me vrasjen e sotme. Viktima u përpoq të garantonte paprekshmëri dhe nga ana tjetër kjo që i ndodhi jo vetëm ishte mesazh, por një akt që dëshmon as askush nuk është i paprekshëm, ai edhe që banon në Rolling Hills apo Kodra e Diellit”, tha Artan Hoxha në Abc News.
“Ish-ushtarak me lidhje në polici, u ekzekutua nga një vrasës i vetëm me pagesë”
Gazetari Artan Hoxha ka zbardhur detaje të reja në lidhje me figurën e Behas Sofisë, të ekzekutuar ditën e sotme me dy plumba silenciator në mes të Tiranës. Artan Hoxha u shpreh se në vendin e ngjarjes ka pasur një qitës të vetëm i cili nuk ka pasur lidhje me viktimën por ka qenë vrasës me pagesë.
Ndalur tek e shkuara e Sofisë, Hoxha tha se ai ishte një personazh ndër më të fortit në Shqipëri që qëndronte në prapaskenë pa dashur të binte në sy. Ai theksoi se Sofia ka qenë ushtarak me lidhje të forta në polici që qëndronte në qarkullim, por askush nuk i afrohej.
“Ngjarja e sotme është shumë e rëndë për mënyrën si ndodhi, orarin dhe vendi. Këto janë vrasje me mesazh brenda. Mesazhi në këtë rast nuk ka objektiv vetëm ekzekutimin e viktimës. Më duket e ngjashme me vrasjen e bankierit Santos, para bankës për t’i çuar mesazh objektivit. Kjo është tipike vrasje mafioze me vrasës të paguar ku ekzekutori nuk ka lidhje me viktimën. Në vendin e ngjarjes është parë një qitës i vetëm.
Kjo mund të jetë bërë për lehtësi për ta nxjerrë atë nga vendi i ngjarjes. Ajo që është fakt është se kemi të bëjmë me një vrasës të vetëm.
Është një nga personazhet më të vjetër në qarkullim. Ka qenë aktiv për më shumë se dy dekada. Pas ardhjes së demokracisë, ai është me të kaluar ushtarake. Ka qenë pjesë e FA dhe pastaj është larguar drejt Turqisë. Për herë të parë ka dalë me emrin Fatmir Sofia në vitin 1998. Ka qenë një emër në qarkullim që askush nuk i afrohej. Ka pasur tentativa të mëparshme për ta vrarë.
Aftësia e personazhit që ka humbur jetën sot, ka qenë se gjithmonë gjente lidhjet e duhura në radhët e Policisë së Shtetit. Më shumë spikaste si biznesmen. Sa herë përmendej emri i tij, policia shikonte me dyshim. Prandaj u bë i rëndësishëm. Është një nga njerëzit më të fortë në Shqipëri që nga momenti ku u bë objektiv i disa atentateve të njëpasnjëshme. Ai po përpiqej të siguronte një jetë normale për fëmijët e vet. Ai në botën e krimit është personazhi që fluturon ulët që të mos bëjë shumë zhurmë. Në trafikun e heroinës që vjen nga Afganistani është ndër më të rëndësishmit. Në vitin 1998 është kapur me personazhe shumë të famshëm të Shijakut. Në momentin e parë kur është kapur me një futbollist të Fenerbhaçes”, tha Artan Hoxha.
