Kreu i PD-së, Lulzim Basha, i ka konsideruar “bombë me sahat” fasonët dhe call center-at, ndërsa tha se mendimin për mbylljen e tyre, në situatën e krijuar nga koronavirusi, e mbështesin edhe vetë pronarët dhe punëtorët.
Basha tha se kryeministri Rama duhet t’i dëgjojë ata, ndërsa shtoi se po ashtu duhet të dëgjojë edhe propozimet e opozitës, pasi “qëllimi është ndihma në këtë gjendje lufte”. Sipas kreut të PD-së, mbajtja hap e fasonerive dhe call center-ave do të zhvlerësonte përpjekjet për distancim.
“Kam një mendim krejt ndryshe për fasonët dhe call centers nga ajo që ka shprehur kryeministri sot. Nuk është thjesht mendim vetëm i imi, është mendimi i ekspertëve tanë, është mendimi i përfaqësuesve të këtyre degëve të ekonomisë. Gjatë gjithë ditës së sotme kam qenë në kontakt me përfaqësues të shoqatave të fasonerisë, me pronarë dhe administratorë të call centers, të cilët pas mesazhit tim të paradites, në mënyrë unanime pa asnjë përjashtim, e kanë mbështetur dhe kanë përshëndetur kërkesën time. Mendoj se kryeministri duhet t’i dëgjojë ata.
Gjithashtu duhet të dëgjojë çdo propozim që vjen, qoftë nga opozita sepse qëllimi im, qëllimi i Partisë Demokratike, i opozitës nuk është as t’i bëjë hije, as t’i bëjë karshillëk kryeministrit, por të ndihmojë sa është e mundur përmes propozimeve konstruktive për marrjen e masave të domosdoshme në këtë gjendje lufte, siç e ka quajtur, në këtë gjendje të vështirësisë së jashtëzakonshme për njerëzit. Dhe këtu nuk ka absolutisht asnjë diskutim:
E para, që këto biznese janë vatra të rrezikshme, të cilat zhvlerësojnë çdo përpjekje tjetër që bëhet për distancimin social, hedhin poshtë çdo përpjekje tjetër që bëhet nëpër shtëpitë duke i mbajtur të izoluar njerëzit, në qoftë se kryefamiljarët, kryefamiljaret në rastin e fasonerisë, i mbledhim në ambiente të mbyllura në një afërsi të tillë fizike me shumë pak mjete mbrojtëse, krejtësisht të pamenaxhueshme. Pra, është qartësisht një bombë me sahat.
E dyta, nuk janë biznese jetike, në veçanti fasoneria, e cila e ka mbi 90% biznesin e lidhur me Italinë apo Francën, apo Spanjën, në komunikimin e përditshëm që kam operatorët ekonomikë në Shqipëri, ka më shumë se dy javë që kjo degë e ekonomisë si dhe degë të tjera kanë stopuar praktikisht. Sepse e tërë Italia është futur prej më shumë se një muaji në një situatë ndalimi të çdo aktiviteti jo esencial ekonomik, po kështu edhe vendet e tjera. Pra, nuk bëhet fjalë këtu për aktivitetet jetike për ekonominë. Aktivitetet jetike për ekonominë janë ato që mbështesin zinxhirin e përditshëm të furnizimit me mallra ushqimore, farmaceutike, ujin, energjinë”, tha Basha.
