Një grabitje me armë ka ndodhur në autostradën Lushnje – Fier në orët e vona të mbrëmjes të së dielës. Sipas informacioneve, grabitja ka ndodhur në zonën e quajtur “pushimi i shoferit”.
Mësohet se autorët kanë grabitur drejtuesin e një automjeti dhe më pas i kanë marrë makinën tip Benz. Ata i dolën para mjetit duke i bllokuar rrugën me automjetin e tyre dhe nën kërcënimin e armës e grabitën.
Bazuar në kallëzimin e shoferit, autorët ishin të armatosur, njëri me kallashnikov e tjetri me pistoletë.
Mjeti me të cilin grabitësit bllokuan rrugën ishte me targa angleze dhe dyshohet të jetë i vjedhur.
Pas grabitjes autorët u arratisën ndërsa shoferi i mjetit që ra pre e kësaj grabitje bëri denoncim në polici. Uniformat blu kanë ngritur postblloqe për kapjen e tyre, por deri tani nuk ka asnjë shenjë prej tyre.
