Ambasadori i Bashkimit Europian në vendin tonë, Luigi Soreca, ka përshëndetur veprimin e Shqipërisë, e cila sot dërgoi ekipin e dytë me 60 infermierë për të ndihmuar shtetin e Italisë në përballimin e pandemisë globale të COVID-19. Me një shënimi në rrjetin social “Facebook”, ambasadori Soreca e konsideron këtë veprim si “të shkëlqyer”.
“Një tjetër gjest i shkëlqyer solidariteti nga Shqipëria. Sot 60 infermierë shqiptarë fluturuan në Itali për të dhënë kontributin e tyre në luftën kundër COVID-19. Solidariteti është në zemër të vlerave të BE. Faleminderit shumë Shqipëri!”, shkruan Soreca.
Gjithashtu, ky gjest i Shqipërisë nuk ka kaluar pa marrë vlerësimin edhe të ambasadores së SHBA në Tiranë, Yuri Kim. Ajo thekson se Shqipëria meriton një falënderim special për aktin e solidaritetit, që ka treguar me fqinjin e saj.
“Si shtet anëtar i NATO-s në betejën e përbashkët nga COVID-19, një falënderim special Shqipërisë për dërgimin e infermierëve në Itali! Ne jemi NATO”, shkruan ambasadorja e Shteteve të Bashkuara të Amerikës, Yuri Kim.
Kim ka postuar edhe një video të ambasadores së SHBA në NATO, Kay Bailey Hutchinson, e cila është shprehur se, “lidhja jonë si aleatë të NATO-s mbetet e pathyeshme dhe së bashku do të mbizotërojmë”.
As NATO Allies band together to fight #COVID19, special thanks to 🇦🇱 for sending medics to 🇮🇹 (at 0:38). #WeAreNATO @ediramaal @xhacka_olta @ItalyinALB https://t.co/ONGQ1zwxgR
— Ambassador Yuri Kim (@USAmbAlbania) April 20, 2020
“Javët e shkuara kemi parë shumë histori inspiruese sesi aleatët bashkëpunojnë në këto kohë të vështira. Doktorë kanë udhëtuar nga Shqipëria dhe Polonia për të ndihmuar kolegët e tyre italianë”, ka theksuar ambasadorja Hutchinson.
Pavarësisht faktit se Shqipëria vijon të përballet me pandeminë globale të COVID-19, ajo ka zgjedhur të qëndrojë në krah të Italisë për ta ndihmuar sadopak në këtë gjendje aspak të zakontë.
