Ndahet nga jeta në moshën 82-vjeçare politikani i njohur sllovak Eduard Kukan pas problemeve me zemrën.
Në nderim të tij, Kuvendi i Shqipërisë mbajti sot një minutë heshtje.
Kukan nga viti 1998-2006 ka qenë ministër i Jashtëm i Sllovakisë. Në vitin 1999, Kukan u emërua i dërguari i posaçëm i Kombeve të Bashkuara për Kosovën, një rol që e mbajti së bashku me Carl Bildt.
Në 2009 u bë pjesë e Parlamentit Europian dhe ka shërbyer në Komitetin e Punëve të Jashtme.
Ai shërbeu gjithashtu edhe si i dërguar i posaçëm i Kombeve të Bashkuara për Ballkanin, i emëruar nga Sekretari i Përgjithshëm i atëhershëm i OKB-së Kofi Annan.
Eduard Kukan ishte një nga mbështetësit e Shqipërisë në Parlamentin Europian dhe shpesh ishte pjesë e delegacioneve ndërkombëtare që ndërmjetësonin krizat në politikën shqiptare.
Vitet e fundit, ai shërbeu si një nga bashkë-lehtësuesit në Dialogun Ndërpartiak për kushtet elektorale në Serbi.
