Negociatat e pranimit të Shqipërisë në Bashkimin Europian diskutohen sot në takimin e Këshillit të Punëve të Jashtme të bllokut. Në përgjithësi krerët e diplomacisë së 27 vendeve anëtare do të diskojnë angazhimin e tyre me partnerët në Ballkanin Perëndimor.
Përfaqësuesi i Lartë i BE-së Josep Borrell do t’u paraqesë ministrave një dokument strategjik, ku shprehet qëllimi i qartë i hapjes së negociatave me Shqipërinë e Maqedoninë e Veriut.
Synimi i Komisionit është thirrja e konferencës së parë ndërqeveritare për Shqipërinë në muajin Qershor, pas vlerësimit pozitiv që vendi mori për organizimin e zgjedhjeve të përgjithshme të 25 Prillit. Pritet të merret një vendim edhe për ndarjen e Shqipërisë nga Maqedonia e Veriut pasi kjo e fundit vazhdon të ketë mosmarrëveshje me Bullgarinë për çështjet historike.
Vendimi përfundimtar për negociatat i takon Këshillit Europian.
