Deputetja e opozitës parlamentare, Rudina Hajdari duket se po përgatitet të finalizojë në shtator idenë e krijimit të një partie të re politike me të cilën do të marrë pjesë në zgjedhjet e vitit 2021.
Përmes një sondazhi të zhvilluar në rrjetin Instagram, Hajdari ka kërkuar nga ndjekësit sugjerime për hapat e metejshëm të saj në politikë.
Pyetjeve të ndjekësve, ndërsa flitet për krijimin e një partie të re, ajo u ka kthyer këtë përgjigje:
“Beteja për hapjen e listave u fitua falë mbështetjes së shumicës absolute të shqiptarëve. Jam e bindur se do i hapim 100%. Uroj që të njëjtën mbështetje ta ketë edhe për projektin e ri politik, i cili do të synojë bashkimin e tyre, që duan punën e ndershme dhe e shohin të ardhmen në këtë vend, kundër atyre pak të pangopurve që kanë 30 vite që majmen në kurriz të djersës së shqiptarit të ndershëm. Jam e bindur se projekti i ri politik që po përgatisim me ajkën e qytetarisë do të bashkojë së pari rininë studentore e cila ka qenë gjithnjë në krye të ndryshimit”.
Në fakt ideja e krijimit të një force politike është artikuluar edhe më herët nga Rudina Hajdari, e cila ndonëse hyri në parlament në listat e PD vendosi të qëndrojë duke mos e djegur mandatin.
