Qazim Kasem Ismaili, do jetë ndjerë keq kur në rrjetet sociale ka filluar sot në mëngjes një fushatë shkrimesh denigruese për emrin e tij, pa e ditur se ku e kanë origjinën. Ismaili, është nisur me grupin e 30 personave (mjekë dhe Infermiere) drejt Italisë, dhe që nga dita e sotme, kanë filluar punën në spitalin e Breshias.
Por, ditën e sotme 56-vjeçari e ka gjetur emrin në media, si një punëtor karburanti në Vorë, dhe jo si infermier i licensuar qe nga viti 1993, siç tregon edhe Urdhri i Infermierit dhe certifikata e tij personale.
Ai vetë do i jetë futur punës në spital, por ministria, nisur nga interesimi i gazetarëve, ka publikuar licencën e tij nga Urdhëri i Infermierit, me detajet specifike dhe të dhënat personale.
“Nuk është e vërtetë çfarë pretendohet. Nuk di pse nis kjo fushatë denigruese kundër atyre që patën kurajon të shkojnë në vijën e parë të sëmundjes”, thonë zyrtarisht nga Ministria.
Reagon Urdhri i Infermierit: Lejet e ushtrimit të profesionit janë të njohura në Itali
Urdhri i Infermierit të Shqipërisë ka reaguar pas aludimeve në disa media se mes infermierëve të dërguar në Itali ka edhe njerëz që nuk e ushtrojnë këtë profesion.
Në reagim thuhet se të 20 infermierët janë anëtarë aktivë të Urdhrit dhe janë të pajisur me lejen e ushtrimit të profesionit.
“Urdhri i Infermierit shpreh indinjatën e tij përkundrejtë të gjithë aludimeve që po bëhen për të zbehur kontributin e profesionistëve tonë në shtetin fqinj, Italinë”, thuhet në reagim duke shtuar se lejet e ushtrimit të profesionit të lëshuara nga Urdhri janë plotësisht të njohura nga organet homologe në Itali.
Më herët, disa media e quajtën infermierin Qazim Ismaili, i cili ka shkuar në Itali për të dhënë kontributin e tij, si “pompist të veshur si mjek”.
Por më vonë u bë publike leja e ushtrimit të profesionit të Ismailit si infermier. Përveç se shërbimit në spitalet shqiptare, Ismaili kishte punuar edhe si infermier në Itali disa vite më parë.
Deklarata e plotë:
Urdhri i Infermierit të Shqipërisë informon opinionin publik se 20 Infermierët të cilët në këto momente po japin kontributin e tyre në luftën kundër Covid – 19 në Spitalin e Brescias në Itali, janë të anëtarë aktivë të Urdhrit dhe të pajisur me Lejen e Ushtrimit të Profesionit të Infermierit.
Urdhri i Infermierit shpreh indinjatën e tij përkundrejtë të gjithë aludimeve që po bëhen për të zbehur kontributin e profesionistëve tonë në shtetin fqinj, Italinë.
Lejet e Ushtrimit të Profesionit të lëshuar nga UISH janë plotësisht të njohura nga organet homologe në Itali.
