Presidentja e Komisionit Europian, Ursula von der Leyen premtoi sot çdo ndihmë të nevojshme për Italinë, vend anëtar i BE-së, më i prekuri nga pandemia e koronavirusit.
“Ne jemi shumë të gatshëm të ndihmojmë Italinë për gjithçka që do të ketë nevojë. Kjo është shumë e rëndësishme”, deklaroi ajo
“Ky vend është prekur rëndë nga koronavirusi. Prandaj do të plotësojmë të gjitha nevojat e tyre”, theksoi ajo në një konferencë për shtyp.
Nëntë ekspertë kinezë për koronavirusin dhe disa tone ndihma mbërritën dje në mbrëmje në Romë në bordin e një avioni special për t’i ardhur në ndihmë Italisë, vendi më i prekur në Europë nga koronavirusi, bënë të ditur sot burime aeroportuale.
BE kundër mbylljes së kufijve nga COVID-19
Presidentja e Komisionit Europian, Ursula von der Leyen paralajmëroi sot kundër mbylljes së kufijve, vendosur nga disa vende të BE-së për të luftuar kundër pandemisë së koronavirusit.
“Ndalimet e udhëtimit të përgjithshëm nuk janë konsideruar si shumë efikase nga Organizata Botërore e Shëndetësisë”, deklaroi shefja e ekzekutivit europian në një konference shtypi.
“Përveç kësaj, ato kanë pasoja të rëndësishme sociale dhe ekonomike, ato prishin jetën e njerëzve dhe të bizneseve,” shtoi ajo duke nënvizuar se të gjitha masat duhet të jenë proporcionale.
Drejtuesja gjermane kërkoi masa të kontrolleve sanitare.
“Këto mund të ndodhin në kufijtë e jashtëm të BE-së ose të brendshëm, ose në territorin e shteteve anëtare”, theksoi ajo.
Rekomandimet e BE për këtë çështje do t’i prezantohen 27 ministrave të Brendshëm, të mbledhur sot në Bruksel.
