Vendi i parë në botë që po vuan urinë për shkak të ndryshimeve klimatike
“Më shumë se një milion njerëz që përballen me urinë e parë të shkaktuar nga klima në Madagaskar dhe ato po paguajnë çmimin për fluturimet e lira në Europë dhe pajisje të tilla si ngrohësit me gaz”, ka thënë ministrja e mjedisit e Madagaskarit.
Prej disa vitesh, jugu i Madagaskarit ka pësuar thatësira të njëpasnjëshme me ashpërsi në rritje dhe situata është përkeqësuar ndjeshëm gjatë muajve të fundit. Në gusht, OKB-ja tha se vendi po përballej me urinë e parë në botë nga ndryshimet klimatike. Të martën, një përfaqësues i Programit Botëror të Ushqimit foli për një vizitë “zemërthyese” në vend.
Duke folur për The Guardian në Cop26, Baomiavotse Vahinala Raharinirina, ministre e Madagaskarit për mjedisin dhe zhvillimin e qëndrueshëm, tha se dështimi i vendeve të pasura për të përmbushur një objektiv financimi klimatik do të thotë se vendi i saj nuk mund të përballojë ndërtimin e një tubacioni uji për të zbutur thatësirën më të madhe të ishullit në 40 vjet.
Vendet e zhvilluara kanë premtuar të japin 100 miliardë dollarë në financimin e klimës për të ndihmuar vendet si Madagaskari të përshtaten që nga viti 2009, por javën e kaluar ky objektiv u vonua përsëri.
Raharinirina tha se një tubacion që do të sillte ujë nga veriu i ishullit në jugun e goditur nga thatësira do të kushtonte vetëm 9 milionë dollarë, por vendi nuk mund ta përballojë atë.
“Po pyesja veten tre ditë më parë gjatë një seance negociuese pse është kaq e vështirë për vendet e pasura të paguajnë këto para. Nuk është ndihmë. Është përgjegjësi”, tha ajo. “Mendimi im është se në veri ka një distancë psikologjike me problemin. Njerëzit shohin dokumentarë dhe fotografi, por nuk e ndiejnë atë si ne kur shkojmë në pjesën jugore të vendit tim”.
Ajo shtoi se ka një problem me sjelljen e europianëve dhe amerikanëve dhe pasojave për njerëzit në jugun global, që durojnë temperaturat 45 gradë gjatë gjithë vitit me pak reshje shiu, duke bërë thirrje që veriu global të reflektojë.
“Njerëzit nga jugu i Madagaskarit janë viktima të diçkaje që nuk e kanë bërë”, tha ajo.
“Ata lëvizin në perëndim të Madagaskarit dhe është një rrezik real për biodiversitetin. Kur lëvizin, ata shkojnë drejtpërdrejt në zonat e mbrojtura ku mund të gjejnë burime si druri dhe bimët mjekësore, gjëra që zakonisht janë të ndaluara”, tha ajo.
Madagaskari është ishulli i pestë më i madh në botë dhe është shtëpia e shumë kafshëve dhe bimëve që nuk gjenden askund tjetër në Tokë. Më shumë se 600 lloje të reja u zbuluan midis 1999 dhe 2010.
Raharinirina argumentoi se fluturimet e lira në veriun global duhet të ndalohen dhe u kërkoi britanikëve të mos fluturonin drejt destinacioneve të njohura të pushimeve si Spanja.
“Ne duhet të ndalojmë fluturimet me kosto të ulët ku ndonjëherë keni dy persona që shkojnë nga Parisi në Madrid ose nga Edinburgu në Vjenë. Është një fluturim me kosto të lartë për njerëzit në vendin tim. Ata paguajnë çmimin e kësaj. Në shtator, isha duke marrë pjesë në kongresin e IUCN në Marsejë dhe u trondita kur pashë njerëz që darkonin jashtë restoranteve që po ngrohnin me gaz. Kjo duhet të jetë e paligjshme”, tha ajo.
Ajo shton se ka shumë gjëra që duhen ndryshuar në mënyrën e jetesës së shumë njerëzve europianë, amerikano-veriorë apo kinezë. “Duhet të bësh një zgjedhje ose duhet të bësh një sakrificë”.
